Xabi Durango (Kaia-BES): “Negoziazioek luze joz gero, zamaketarien borroka sekulakoa izango da”
2020-10-16
Bilboko portuko zamaketariak greban daude. Urriaren 9an hasi zuten lanuztea eta, Euskal Herriko merkantzia sarbiderik handiena gutxieneko zerbitzuetan arituko da, printzipioz, hilaren 25era arte. 1983az geroztik Bilboko portuan egon den protestaldi luzeenaz gabiltza. Bi orduko eta egun osoko lanuzteak tartekatuko dituzte epe horretan. Langile batzordeko sindikatu guztiek bat egin dute, ELAk izan ezik; haren afiliatuek, dena den, lanuzteak egingo dituzte. Izan ere, ondo dakite asko dutela jokoan.