Azken bideoak: Ekonomia

Greba mugagabea hasi dute Matriceria Deustoko eta GTSko langileek, itxieraren aurka. Beharginek manifestazioa egin dute lehen orduan, Zamudiotik aterata. Mobilizazioekin, Gestamp taldeak itxi nahi dituen bi lantegiak eta 230 kaleratzeak gaitzetsi nahi dituzte. Lan duinaren defentsan, greba hasi dute gaurko egunean ere bilboko portuko zamaketariek. Hamasei egunez iraungo du lan uzteak, eta, lan baldintza berriak adosteko negoziazioetan BilboEstiba enpresa elkarteak izan duen jarrera salatzeko antolatu dute borroka.

Lapuebla de Labarcako alkate ohia eta senide bat hil dira upategi batean izandako lan istripuan. 52 eta 56 urteko bi langileak asteazken arratsaldeko azken orduan hil dira Arabako Errioxako upategi bateko mahats-biltegira erorita.

EAEko udalek berreraikuntzarako Europako funtsetatik datorren diruaren %30 jasotzea nahi du EH Bilduk. Zehazki, udalek funts horien %20 zuzenean jasotzea nahi du, eta gainerako %10a "zeharka" eragiten dieten proiektuen bidez jasotzea.

Ekonomia suspertzeko asmoz Europar Batasunak iragarri dituen diru-laguntzak jaso ditzaketen proiektuak aztertzeko erakundeen arteko idazkaritza tekniko bat sortzea erabaki dute Eusko Jaurlaritzak eta Araba, Bizkaia eta Gipuzkoako foru aldundiek. Organo hori Ogasun Sailaren menpe egongo da.

Iñigo Urkullu Lehendakariak Yolanda Díaz Lan eta Gizarte Ekonomiako ministroa hartu du gaur goizean Lehendakaritzan. Bileran Idoia Mendia bigarren lehendakiordea eta Lana eta Enpleguko sailburua ere izan da.

Euskal Herriko Eskubide Sozialen Karta osatzen duten sindikatu eta eragileak zein Zaldibar Argituk indarrak batu dituzte zabortegiaren hondamendiko epaiketan herri akusazio gisa aurkezteko. Bestaldetik, Trapagarango Productos Tubulares enpresan hilabetean izandako bigarren heriotzaren kontrako protesta burutu da Bilbon.