Albisteak

Egun batzuk besterik ez dira geratzen aurtengo Diadarako. Ezohikoa izango den egun horri buruz hitz egin digu Elisenda Paluzie, ANCko presidenteak. Covid-19ak protestetan izango duen eraginaz gain, Urriaren 1eko erreferendumaz geroztik gobernuak izandako jarreraz eta alderdien arteko hika mikez jardun dugu, besteak beste, berarekin.

Bereziki ezberdina izango da egun bizi dugun egoerak baldintzatuta Zinemaldiaren 68. edizioa. Gaur aurkeztu dituzte edizio honi dagozkion antolakuntzaren xehetasunak, Tabakalerako zinema aretoan. Horiek erabakitzerako orduan Europako gainontzeko zinemaldiak ere kontuan izan dituztela nabarmendu du Jose Luis Rebordinos zuzendariak.

Hego Euskal Herriko ikasturtea hastear denean, Espainiako Gobernua koarentenan dauden haurren gurasoei gaixo-agiria eman edo ez aztertzen ari da. Aurreko egunetan ohartarazitakoaren arabera, haurrak positibo emanez gero bakarrik emango zaie baja gurasoei. Gaur zehaztapen gehiago eman ditu.

Ipar Euskal Herriko eskolek atzo hasi zuten ikasturte berria eta hegoaldean datorren astean dira hastekoak . Covid-19aren hedapena dela eta, Frantzian lehenengotik emango diete gurasoei gaixo agiria ikastetxe bat ixten bada. Horrela, gurasoak haurraren hezkuntzaz arduratuko dira. Espainian, ordea, soilik positibo eman duten haurren gurasoek izango dute gaixo-agiria eskatzeko aukera.

Langile gehienak aste honetan hasi dira lanean, eta akordioa iraila amaitu aurretik lortu nahi dutela adierazi dute. Koronabirusaren pandemiak areagotu egin du etxetik lan egiteko beharra. Gutxi dira langileekin eginiko hitzarmenetan telelana arautua duten enpresak, eta Hego Euskal Herrian ez dago lan mota horri buruzko legerik.

Iraila hastear da eta horrekin bat, hainbat langile beren postuetara itzultzear daude. Askok etxetik jardun beharko dute lanean, eta horrek dakartzan zalantzak argitze aldera, Espainiako Gobernua lege bat lantzen ari da. Bihar ekingo die berriz negoziazioei sindikatu nagusiekin eta enpresaburuen elkarteekin.